Serial Glembo: Piala Adipura Ning Tengah Sawah

Cuplik.Com - Angin semilir sing arah wetan, Glembo, alias SuperSiG, penggemar MotoJipi Marko Simoncelli, lagi sante-sante ning gardu cicitcuwit, ning duwur tanggul petit kali Bangkir. Ning kupinge nyangkol 'engset ape', biasane nyetel tarling, bareng duwe PESBUK selerane ganti, nyetel lagu-lagu Blues, awit lagune "My Guitar Wants To Kill Your Mama" deke Frank Zappa, 'Going Down' deke Steve Vai, 'Surving With The Aliens' deke Joe Satriani, tekang lagune Jimmy Hendrix 'Little Wings'.

Endase manggut-manggut, awake lende-lende ning gardu, tangane cetak-cetik udud sing bungkuse cap balung kirik, matane merem nikmati musik, sikile munggah meng duwur semampir ning saka gardu, karo telapakane jengat-jengit.

Tangpa sadar, sing arah iringan, ana tugelan bata di tibakaken meng papan gardu, "BRAAKKKK!!!!" Glembo sing lagi sante, kaget sekarat kadal, njimbul mencelat, matane sasah mencilak.

Toli krungu suara, "Waduhh, Glembo anakan Tarkama, kosi sante temen tumpang tali tangpa pegaweyan, kosi kaya anakan menteri," jare Bi Koyimah bari liwat.

Terus ana Wa Rakijah nyusul ning gurine,"Nang, su.. Beli mangkat angon tah?"

Bi Rastiyem ora ketinggalan melu nyambung, "Lagi nonggoni Carwiti balik tandur ya Bo? Kosi sing aran wong demen, tandur gah di enteni, masih suwe Bo! Carwiti lagi tandur ning sawahe Kaji Kocol ikah, telung bau dewekan bae."

"Kosi banget ya sampeyan kabeh kuh, beli ngarti wong lagi asik. Ganggu bae! Bari gah arep pada mendi kunuh baris impyag-impyagan nggo tapih meng tengah sawah kuh? Dika maning Bi Koyimah, udud di kacar bae, wis wadon tua iku, ngudud pisan," jare Glembo ora kalah moyok.

Bi Koyimah nyewot kaya Belanda dibedil cekere, "Bribina bae gah anakan tarkama, protes bae ning wong dawuk kuh, remos pisan cangkeme kogah! Arep pada ngendog, melu ya ayuh mene ngintil ning guri bokong gepekan tapih,"

"Ora bae gah, beli sudi open. Sampeyan wong telu kuh ya, awit perawan ning jaman Jepang mudun ning Eretan, tekan wis tua bongkoken, ngendog ning sawah mulu. PANTESAN DERMAYU BLI MAJU-MAJU, GONANG APA OLIH PIALA ADIPURA.. RAKYATE MASIH ANA BAE SING NGENDOG NING KOMBONG KALI KARO NING GALENGAN SAWAH KRUKUBAN SARUNG.. BANGETT !" Glembo pidato kaya Camat lara wudun.

"Mana protes ning negara, pingpinan daerahe beli bisa gawe apa-apa konon.. bisane KAMPANYE !" Bi Koyimah ora kalah nyentak karo Glembo.

Ceppp.....!!!! Jagat dadi sepi maning. Glembo sante-sante maning. Kesawang sing kadohan, keteluane pada dodok ning tengah sawah pinggir kalen. Mbuh pada apa, rapat negara, bokat...

Penulis merupakan Admin dari Fanpage Indramayu Kota Mangga