Serial Glembo: Kaji Dulmin Nyalon Demang

Debleng : "Nyupang ning pulomas Ji..? Wadale sapa ji..?"

Kaji Dulmin : "Wadale ya SIRA, toli sapa maning..? Mangsa toli wadale wong edan, setane gah mangsa gelema, wong edan mah getihe pait,"

Debleng : "Hus! Aja selewa-lewa gah Ji, mangsa reang sing dadi wadal? Reang durung kelakon ngawis Nok Carnengsih, perawan petit desa sing lagi mangkat dadi TEKAKI ning ngarab,"

Kaji Dulmin : "Carnengsih anakan intul dudu? Sing bapa tuane aran Cikur sing di buang ning Pulo Buru kenang keglibed jaman PEKAKI lagi jaman Presiden Suwarto?"

Angin semilir sing arah wetan, suasana tempat ngobrol ning tanggul Kali Cimanuk kosi ridem sebab mendung. Wiwitan weringin growak sing wis rada miring ngiwe, godong kuninge rontog kempos angin semilir, pating blarat ngawur-ngawur gawe suker sejagat-jagat. Sing arah kulon, Glembo lan Clangab balik angon wedus, weruh mengkonon kaji dulmin langsung tangi lende-lendene.

Kaji Dulmin : "Glembo, mene mampir tek bisiki..."

Glembo lan Clangab pandengan mata, cahya matane kerasa ana sing aneh, ora biasa-biasane kaji dulmin arep mbisiki. Tapi kelanjur katon lan di awe-awe, Glembo lan Clangab kepaksa mampir ning ranggon pinggir kali, sor wiwitan weringin growak sing wis katon miring ngiwe kepangan umur.

Glembo : "Apa Ji, bisik-bisikan kaya Romeo karo Taringkem bae, wis gah kari ngemeng bae,"
Kaji Dulmin : "Nang, Bo, SU.. Aja klalen pilih reang.. Angger, bagen priwe-priwe gah, mbok bapanira masih rayat reang, bapa Tarkama bapanira iku ponakan tunggal sembok karo sembok reang sing uga masih tunggal putu sejen bapa sing buyut Ciklong sing kakang adi sejen sembok karo wa Rakijah mbok tuane Debleng sing tunggal putu karo mbok tuanira. Paham?!"

Glembo mblanga bae ngerunguaken silsilah dulur rayat sing di cerita aken Kaji Dulmin.

Glembo : "Mbuh gah ji, ruwed temen. Langsung bae ingtine, maksude milih priwe?"

Kaji Dulmin : "Wah, beli paham-paham, kalesan bocah angon, PILIH REANG DADI DEMANG.. ngarti???"

Debleng : "Bo, Ngab, taun rongewu lulas, kang kaji maju nyalon, coblosen cungure utawa apane,"

Clangab : "Aiiihh, maksude mah sampeyan pengen di coblos Ji...?"

Kaji dulmin : "Naahh bener bocah pinter.."

Kaji Dulmin langsung nyengir, ngrungu jawaban Clangab. Artine Clangab wis paam hil-hil pencoblosan.

Clangab : "Coblos colok, Ji..?"

Kaji Dulmin : "Iya bocah pinter bocah bagus," Kaji Dulmin tambah nyengir.

Glembo : "Beres ji! Yakin ji beli sewot?"

Kaji Dulmin : "Nyewot priwe, ya beli, malah pengen tambah ngucap kesuwun,"

Kalesan Glembo, matane plirak-plirik rada bingung ngartiaken pangucape Kaji Dulmin. Kayu lajer sing nganggo nggiring wedus, kaligane di colokaken ning untune Kaji Dulmin.

"CROTT, CROTT, CROTT !!!"

"WADUH BOCAH EDAAAAN, SING DI COLOK IKU GAMBARE REANG MENGKO BAKA PEMILIHAN, WONG EDAN!" jare Kaji Dulmin

***