Serial Glembo: Kompanye Kaji Dulmin Numpak Singa Barong

Usum pencalonan demang, daerah blok Kibuyut Wanakirun dadi rame, kabeh dadi ubeg repot, Pilkadem alias Pemilian Kepala Demang dadi obrolan nunggal pojok desa, kaji Kocol mihak calon demang Kaji Dulmin, Kaji Kincling mihak calon demang aran Kaji Dalban.

Kaji karo kaji, sesama kaji, maune ruket dadi musuhan, weruh blok mana manjing mene, sing mene matane dadi mencilak.. blok mene manjing mana, mencilak maning.. matane pencilak-pencilakan, tangane malangkerik kabeh, kaya wayang potel gapan perang..

Clangab : "waduh, ikah lurah Debleng, semangat empat lima kompanye jagoane, njerit-njerit sedalan-dalan, sampe tenggok-e ngelak, langka sing mbayar.."

Dulcikrak : "blok kidul desa, dadi musuhan karo blok wetan desa, yen sliringan ning dalan matane kabeh mencilak.. dongol kepok.."

Glembo : "di gawe aturan sangkane gah, olih mencilak, tapi mencilake mata siji bae, aja kabeh.."

Clangab : "mencilak siji Bo..? baka mencilak kabeh, ukumane apa..?"

Glembo : "ukumane di tepel siji matane, tuman soke aja pada gujrud bae !"

Mau entas liwat lurah debleng, sekiyen liwat maning ulis pagla, nguwar-uwar ning rayat sukiki giliran Kaji Dulmin kompanye, sing wis di pai kaos karo tanggalan, mudu melu kompanye.. nalika liwat ning ngarep genk "Cacamarica" pingpinan Glembo sing pada njentul gardu "Cicitcuwit", Ulis Pagla mandeg, ngaso..

Ulis Pagla : "Bo, Ngab, Krak.. aja klalen melu kompanye sukiki, mbok bapanira soke melu ya..? rencanane Kaji Dulmin kompanye diarak numpak Singa Barong.."

Glembo : "sukiki kita arep suntik, gla !"

Ulis Pagla : "suntik apa sira, suntik edan.. suntik kumat?"

Clangab : "boleh maning baye ya, sekali kompanye numpak singa barong, kaya arep sunat baye.."

Ulis Pagla : "huss, kaji dulmin semono wis kaplak-e, mangsa toli diarane arep sunat.. mantakan bujel mengkone.."

Dulcikrak : "bujel apane gla..? sira kuh ari anu ndukung kaji dulmin, ari anu ngomongaken sing beli pakrah, tekan sebujel rong bujel, wis lah gampang, sukiki reang-reangan ngadang sing kene bae, arak-arakane liwat mene orah, gla-pagla ?"

Jagat sore katon peteng, gerimis murag pating tletik sing duwuran gawe jagat dadi seneb, saya suwe udan saya gede, seisi gardu dadi barji-barbeh, bubar siji bubar kabeh.. balik..

Sukikine, jagat padang, srengenge mencerong sing langit wetan, cahyane gawe anget ning awak, kesawang dalan lurung tinuju kampung blok Wanakirun dadi jeblog kenang udan sewengi, tapi rayat sing wis di upai weruh bakal ana kompanye, tetep semangat, pada nggo kaos gambar kaji Dulmin lan kaji Gablug, pasangan calon Demang asli wong dewek, sing desa Wanakirun, petit kali Bangkir, blok Weringin growak doyong ngiwe..

Genk Cacamarica.. Glembo, Clangab, Dulcikrak, Dolop, Polol, Glabed, Semprang, Kaprawi, Ceple, lan Bluwud wis stan beh ning gardu (jondol) Cicitcuwit.. blenakan ning wong dewek, dadi meluan nggo kaos bagian, ragem..

Jam sanga punjul sanga, kesawang sing arah kulon arak-arakan Singa Barong sing ditumpaki kaji Dulmin.. rakyat jejer sedalan-dalan pada ndengak karo keprok.. wa Bondol, mbok Minot, wa Wasjem, bi Turnyep, bi Kutrem, mang Sagle, wa Dower, kang Cantel, mang Cangkol, lan puluhan wong sejene pada baris ngenteni kaji Dulmin calon demang liwat, lumayan ana iburan lan tongtonan..

Saya suwe saya parek.. kaji Dulmin tangane ngacung duwur numpak Singa, nggo kacamata ireng, topi koboi, jas bagus lengkap dasi khas wong gedean, tapi sikil-e nganggo ceplek, celanane rada di wingkis rada duwur..

Lurah debleng : "ji, laahh, nangapa nganggo ceplek..? beli nggo sepatu..?" (jare debleng sing ngisor karo mayungi kaji Dulmin sing lagi numpak Singa Barong).

Kaji Dulmin : "jagate cebrik Bleng, dalane endut melulu, sepatu reang sepatu kulit, regane larang, luwih larang sing rega weduse sira mbuh apa, eman-eman, bokat belok.." (jare kaji Dulmin sing duwuran).

Guyon-guyon rada jero.. arep sewot beli wani, dadi mung mencu bae cangkeme kaya silit ayam arep anggrem.. arak-arakan tetep laju, Singa Barong di unclang-unclang ning para ponggawane, kaji Dulmin tebar pesona, tangane kadang ning dada, kadang ngawe-awe, kadang "kis-beh"..

Ibarat udan barat campur angin.. dalane mblarat tibane ndingin.. saya maju dalane saya jeblog, lunyu pating plarak.. maklum dalan searah karo dalan tinuju kuburan guri desa, para ponggawa singa sing maune semangat mulai rada cagah-cigih, lakune rimbit-rimbit sebab lunyu, luwih lunyu sing pipine rangda gaya..

Kaji Dulmin nyadar, dalane cebrik, nalika Singa Barong kerasa miring, kaji dulmin gepelan teguh, "CAH, AWAS GAH, SINGA KIH MIRING-MIRING MENGKENEN, BECIK GAH, MARAS TEMEN REANG NUMPAKE !", jare kaji Dulmin.

Si Castiwan, sing ngusung singa ning ngarep, raine abang ireng nahan beban ning dalan lunyu.. sikile planyan-plonyon, cangkeme mringis matane rada merem.. dalan ngarep gardu rada curem, njlorog mengisor toli nikung ngiwe nanjak maning,

"CAH-CAH-CAH, AWAS CAH.. WADUH WADUH WADUUH.. ALON CAAHH.. ALON !", kaji Dulmin ngomong maning kemarasen.

Nyata bae, castiwan lan Darmaji ponggawa Singa ngarep ilang imbangane, saya suwe saya miring.. miring.. miriiiinggg.. Castiwan njerit sewayah-wayah: "ALLAHU AKBAAARR !"

PLARAKK.. SEAKK.. sikil nyeladat !

Singa barong langsung njuleg kaya kapal amerika ketembak suwiwine, kaji Dulmin dadi sekarat kadal, arep njerit tapi kagok, terlanjur mangap dadi bisane nggowar: "HUUWAAAAAAA !!!!!!"

BLUGG !! PHUAKK !! CROTT !!

Ponggawa, kaji dulmin sesinga-singane mblarat sewayah wayah.. wulak-walik njlorog slonjor toli ndakom, slarakan kaya bocah dolanan plorodan tengah sawah..

BREMMMMMMM.. kaji Dulmin njebur kalenan ngekepi Singa mangap..

Nutupi isin, lurah Debleng karo ulis Pagla gawe semangat rakyat: "HIDUP KAJI DULMIN.. HIDUP KAJI DULMIN !"

Kaji Dulmin sing masih ana ning kalenan ketutupan Eceng Gondok karo godong Kangkungan, langsung tangi nendang Singa,

"HIDAP HIDUP, HIDAP HIDUP RAINIRA BUBRAK.. KALESAN ANAK BUAH EDAN.. TULUNGANA REANG DIKIT, BOCA EDAAAAN !!!" jare kaji Dulmin karo embuang godong Kangkung sing nyangkol ning cungur.

Karya: Admin Fanpage Indramayu Kota Mangga (IKM)